အညိုရောင်အိပ်မက်

၁။
ပြတင်းပေါက်ကို အနည်းငယ် လိပ်ပြာ မလုံစွာ ဆွဲပိတ် လိုက်တော့မှ အပြင်ဘက်ရှိ လေစိမ်းတွေကြောင့် ကျွန်မ အခန်းလေး အေးစိမ့်နေတာ သတိပြု မိသွားသည်။

ခန်းဆီး အ၀ါရောင်လေးကို အသာပြန် စည်းနှောင် လိုက်ရသည်။ နာရီကို လှမ်းကြည့်စရာ မလိုတော့လောက်အောင် ညဥ့်နက် နေပြီမှန်း ကျွန်မ ခန့်မှန်း နိုင်ပါသည်။ သည်တော့မှ အခန်း၏ တိတ်ဆိတ် ငြိမ်သက်ခြင်းကြောင့် သူ့ကို ပိုလို့ သတိရ ဖြစ်သွားသည်။

နံရံကပ် ညမီးသီးလေးအား ထွန်းညှိ လိုက်စဉ်တွင်မတော့ သူ့ပုံရိပ်ကို မျက်နှာကြက်တွင် အတိုင်းသား မြင်တွေ့ နေရပြန်သည်။ တစ္တေ ခြောက်နေတာလား။ ကျွန်မကိုယ်ကျွန်မ ပြန်အားပေး လိုက်ရသည်။ တမင်တကာ သတိ ရနေတာမျိုးလည်း မဟုတ်ဘဲ ညဥ့်နက်လာတိုင်း သူ့ကိုသာ မြင်ယောင် မိနေပြန်တာ အနည်းငယ် စိတ္တဇ ဆန်သည်ဟု ထင်သည်။ သည်တစ်ညကိုတော့ လှပစွာ ညဥ့်နက်ခွင့် ပေးရလိမ့်မည်။

၂။
သူ့လို ပုံစံမျိုးကို ကျွန်မ လူမှန်း သိတတ်စ အရွယ်ကတည်းက မြင်ဖူး၊ ရင်းနှီးဖူး ဖြစ်သော်လည်း အနည်းငယ် အချိုးအဆစ် ပြေစွာ သေသပ်သော ပုံစံကြောင့် သူက ကျွန်မ မျက်စိထဲ၌ တစ်မူကွဲ ထွက်၍ သွားပါသည်။ အသားနည်းနည်း ညိုသော သူ့ကို စစတွေ့ချင်းတုန်းက ဆိုရင် ကျွန်မ မျက်စိတွေ ပြာထွက်သွားရသည် အထိ လန့် ဖျပ်မိသွားသည်ကို ၀န်ခံ ရလိမ့်မည်။ သူက ကျွန်မအိမ်နား တစ်ဝိုက်တွင် လာလိုက်၊ ပျော်လိုက်နှင့် ကျက်စားတတ်သူ မဟုတ်လား။

ပထမဆုံး အကြိမ် သူ စရောက်လာစဉ်က ဆိုလျှင် သူက ကျွန်မ၏ လက်တစ်ကမ်း အကွာမှာ အနည်းငယ် တုန်လှုပ်သွားသော ရင်ဘတ်ကို ဖိပြီးမှ အိမ်တံခါးကို အသာချက်ချ ပစ်လိုက်ရသည်။
“နင် သူ့ကိုတွေ့တာ ဘာဖြစ်သွားတာလဲ၊ ရုတ်တရက်ကြီး”

ကျွန်မက လက်နှစ်ဖက်ဖြင့် ရင်ကို ဖိပြတော့၊ ဖြစ်ရမယ်ဆိုသော ပုံစံဖြင့် ညီမလေးက ကျွန်မကို မျက်စောင်းထိုးသည်။
“နင်ပဲ အဲလိုမျိုးတွေ ကြောက်ပါပြီဆို။ လုံးဝကို အပြတ်ရှင်းတော့ မှာဆို”

ညီမလေး သတိ ပေးလိုက်တော့မှ ကျွန်မ ကြက်သီးတွေ ပိုကြီးသွားခဲ့သည်။ သူတို့ မိသားစုနှင့် ကျွန်မကြားမှာ လိမ်ပြာ မလုံသော ရှင်းတမ်းတွေ ရှိခဲ့သည်ကို ပြန်လည် အောက်မေ့သွားသည်။
“သူ ဘယ်လိုလုပ် ဒီရောက်လာတာလဲ”

“ပြောင်းလာတာ ဖြစ်မှာပေါ့ မမရဲ့”

“ငါ့အဖေကို ပြောလိုက်ရမလား”

“အာ မလုပ်နဲ့ဦး၊ သူ ခဏလာတာ ဖြစ်မှာပါဟယ်။ အဖေ့ ပြောလိုက်မှ ပြဿနာ တက်ကုန်ဦးမယ်”

နောင်အခါ ကျွန်မ အိမ်နား တစ်ဝိုက်တွင် သူ့ကို အမြဲ တွေ့ရတော့မှ ညီမလေး စကားကို နားထောင်မိတာ မှားသွားပြီဟု နောင်တရမိသည်။ သို့ပေမယ့် ကျွန်မ ဆေးရုံ အသွား၊ အပြန်အတိုင်း သူ ကျွန်မတို့ ခြံတံခါးဝ နားတွင် ရစ်သီရစ်သီ လုပ်နေတာကို တွေ့မြင်ရလေ့ ရှိပြန်သည်။ နှစ်ပတ်ခန့်လောက် ကြာမြင့် ချိန်တွင်မတော့ သူ ရှိနေမလား ဟူသော မျှော်လင့်ချက် အစွဲဖြင့် တံခါးဝနား ချောင်းကြည့်ဖြစ်သော အကျင့်ဆိုး တစ်ခု ကျွန်မ၌ ပိုင်ဆိုင် လာခဲ့ပါသည်။

၃။
“ဒုက္ခပဲ၊ နင်မုန်းမှန်း သိလို့များ သက်သက်ဒုက္ခ လာပေးနေသလား လင်းစက်ရယ်”

“ရေမြွှာဖောက်သည့် အခန်းထဲ၌ အိုဂျီမမ ရေမြွှာ ဖောက်နေစဉ် ယုနွယ်က ကျွန်မနား အသာကပ်ကာ ပြောလိုက်ခြင်း ဖြစ်သည်။ ခဏနေတော့ နှာခေါင်း စည်းကာထားသော ကျွန်မ နှာခေါင်းများကို အလျင်စလို ပိတ်ပစ်လိုက်ရသည်။ လွန်လွန်းတယ် ဟူသော အကြည့်ဖြင့် ယုနွယ် လှမ်းကြည့်တော့ ကျွန်မ ပြုံးရသည်။

အနည်းငယ် ညှီစို့စို့ နိုင်သည့် ရေမြွှာနံ့ကို ကျွန်မ အလွန် မုန်းပါသည်။ AROM ဟုခေါ်သော ရေမြွှာဖောက် ပြီဆိုလျှင် ၀ါ့(ဒ်)ထဲတွင် ကျွန်မ ပတ်ပြေး နေတတ်သည်။ ပြေးလို့ ဘယ်လိုမှ မလွတ်နိုင်တော့မှ အပြင်ဘက်တွင် အသက်ရှူ လေ့ကျင့်ခန်း အ၀လုပ်ပြီး အခန်းထဲ ၀င်ရသည်။ ကျောင်းသူ ဘ၀ကတည်းက ရေမြွှာနံ့ကို ကျွန်မ ခါးသီးစွာ မုန်းပါသည်။ ယုနွယ်တို့ပင် လက်ဖျား ခါလောက်အောင် ကျွန်မက တဆိတ်ပိုလွန်းသည်။

‘နင်လည်း ရေမြွှာအိတ်ထဲ ကိုးလကျော် နေခဲ့ရတာပဲ မဟုတ်လား”

‘ဟင့်အင်း ငါက Premature လေး။ လမစေ့ဘူး။ ရေမြွှာနံ့ မခံနိုင်လို့ဟေ့။ အစောကြီး အမေ့ဗိုက်ထဲက ထွက်လိုက်ရတာ’

ထိုအခန်းထဲမှ ထွက်ပြီးစဉ်တွင်တော့ ကျွန်မ ပျို့ပါတော့သည်။ ယုနွယ်က အသင့်ဆောင်ထားသည့် သံပုရာခြမ်း စနိုးအား ကျွန်မ နှာခေါင်းဝတွင် တေ့ပေးမှ အနည်းငယ် သက်သာသွားသည်။

“မလွယ်ပါဘူးဟယ်၊ ငါတော့ တစ်သက်နဲ့ တစ်ကိုယ် အိုဂျီ လုပ်ဖြစ်တော့မယ် မထင်ဘူး”

“ငါကတော့ ထင်တယ်၊ နင့်ရုပ်က အောက်လမ်း ဆရာမရုပ် ပေါက်တယ်ဟ”

ယုနွယ် လှမ်းစလိုက်တော့ ကျွန်မက နှုတ်ခမ်းကို အသာမဲ့ပြလိုက်တယ်။ ကျွန်မတို့ လောက၌ အိုဂျီကို အောက်လမ်း ဆရာမတွေဟု ချစ်စနိုး သုံးနှုန်း တတ်ကြသည် မဟုတ်လား။
“ဒါနဲ့ ခုနကဟာ ပြန်ဆက်မယ်။ သူလေသူ နင်တို့ အိမ်နားမှာ ရှိနေတုန်းလား”
“ရှိသေးတယ်ကွ”

“သူ့မှာ အဖေအမေတွေ မရှိရှာတော့ဘူး။ သနားပါတယ်နော် လင်းစက်”

“ဘယ်တတ်နိုင်မလဲဟယ်၊ သူ့မိဘတွေက တခြားသူတွေ အတွက် အနှောင့်အယှက် ဆိုသလို ဖြစ်ခဲ့တာကိုး”

ယုနွယ်က ကျွန်မအတွက် ဖျော်လိုက်သည့် ကော်ဖီအား လှမ်းပေးလိုက်သည်။ ကော်ဖီ၏ အခါးဓာတ်ကြောင့် ရေမြွှာနံ့ကို လုံးဝမေ့သွားသည်။ ရေမြွှာနံ့ပြယ်တော့ သူ့ကို သွားသတိရမိ ပြန်သည်။ စိတ်က အလုပ်လုပ်ပြီး နားမယ် ကြံသေး သူ့ဆီပြန်လည် ကျက်စားရပြန်ပြီ။ ခဏခဏ ခလုတ် တိုက်လာရသော ကျွန်မစိတ်ကို နားမလည်နိုင်စွာ ခနဲ့တဲ့တဲ့ ရယ်မောဟန် ပြင်တော့ ကော်ဖီ သီးသွားသည်။

“သြော် လင်းစက်ရယ်၊ နင့်မှာလည်း တစ်ဒုက္ခ၊ ရော့ရော့ ရေသောက်လိုက်”

၎။
“မင်းကိုပဲ စွဲလမ်းလို့သာနေခဲ့xxx
မင်းကိုပဲ စွဲလမ်းခဲ့ရ တို့ရဲ့ ဘ၀ပါနော်xxx
တင်ဇာမော်၏ စွဲလမ်းခြင်း ပြဿနာ သီချင်းကို ဆိုနေသော ညီမအား ဘုကြည့်ကြည့် လိုက်သော်လည်း မငြိမ်ချင်သေး။

“ရောဂါxxx ရောဂါ xxx”
“အာ ဒီကောင်မလေး တိတ်စမ်း”
ဟောက်ပစ် လိုက်ပေမယ့် ပြောင်စပ်စပ် ဖြစ်နေသော ညီမ မျက်နှာကို ကြည့်ရင်း ကျွန်မပါ ရယ်ချင်သွားသည်။ အင်းလေ၊ ကျွန်မ၏ ပြဿနာ ကလည်း စွဲလမ်းမှုက အစပျိုးတာ မဟုတ်လား။ တစ်စုံတစ်ရာကို အရူးအမူး ကြောက်၍ မုန်းခဲ့ရာမှ ထိုတစ်စုံတစ်ရာကိုပင် မသိစိတ်၌ နေရာ ပေးမိပြန်သည်။ ယခုတော့ သူ့ကို ကျွန်မ၏ မသိစိတ်က ချစ်ပြီး သိစိတ်က မုန်းတီး နေမိသော ဆန့်ကျင်ဘက် စိတ်ကိုပင် ပိုင်ဆိုင် လာတတ်ခဲ့ပြီ။

တစ်စုံတစ်ရာကို တစ်ပြိုင်နက်တည်း အချစ်ရော၊ အမုန်းပါ ခံစားချက် နှစ်မျိုးစလုံး ရှိနေနိုင်သည့် အနေအထားကို စိတ်ပညာတွင် ဘယ်လို ဝေါဟာရမျိုး သတ်မှတ် ထားလိမ့်မလဲ။ Obsessions ဟု အမည်တွင်သည့် အလွန်အကျွံ စွဲလမ်းမှု ပြဿနာ ကျွန်မတွင် ဘယ်အချိန်ကတည်းက ကိန်းအောင်း နေခဲ့လိမ့်မလဲ။ ထိုစိတ်ဖြင့်ပင် ကျွန်မ၏ ညတွေ ညဥ့်နက် လာတတ်ခဲ့ပါသည်။

၅။
ထိုနေ့က မိုးသဲသဲမဲမဲ ရွာသည်။ အရင်ရက် တွေက မိုးရွာ ခဲ့သော်လည်း မဖြစ်စလောက် တစ်ဖြောက်နှစ်ဖြောက်။ ထိုနေ့ကမှ မိုးတိမ်တွေက ပိုမည်းပြီး ပိုထူထပ်နေသည်။ ဂျူတီကုတ်အား မီးပူတိုက်နေရင်း ရုတ်တရက် မီးပျက်သွားသည်။ ဟောင်းနွမ်း တွန့်ကြေနေသော ဂျူတီကုတ်အား ခပ်တည်တည်ပဲ အသာခေါက်ကာ အိတ်ထဲ ထည့်လိုက်သည်။

“ဂျူတီကုတ်ဆိုတာ ညစ်ပေနေမှ အလုပ် လုပ်တာ ပေါ်လွင်နေတာ ညီမလေးရဲ့” ဆိုသော လက်ထောက် ဆရာဝန်အစ်မတွေ၏ စကားကို ကြားယောင်မိတော့ ပြုံးမိရသည်။ အမှန်က ပျင်းလို့မလျှော်၊ မလျှော်လို့ ပိုညစ်ရတာ မဟုတ်လား။ နေ့တိုင်းကြီး လျှော်စရာ မလိုတော့လည်း ဂျူတီကုတ် ဆိုတာကို တစ်ပတ်တစ်ခါ၊ နှစ်ပတ် တစ်ခါလောက်မှ လျှော်ပစ်ကြသည် အထိ ညစ်ပတ် တတ်ကြပါသည်။

ထီးမဆောင်းတတ်သော ကျွန်မအတွက် မိုးကာ အင်္ကျီတော့ လိုလိမ့်မည်။ မယူတော့ ပါဘူးလေဟု ဆုံးဖြတ်ပြီးမှ ၀ါ့(ဒ်)ထဲတွင် နေ့ လယ်နေ့ခင်း ဆွေးနွေးချက် ရှိကြောင်း သတိရမိ၍ ယူလိုက်သည်။ ဖောင်းပွနေသော လက်ကိုင်အိတ်အား အသာဆွဲ၍ ထွက်လာ စဉ်တွင်တော့ အရင်လိုသူ ရှိမနေကြောင်း ရိပ်မိခဲ့သည်။

သူ ဘယ်မှာလဲ။ ကျွန်မအတွက် သဲလွန်စ တစ်စုံတစ်ရာ ချန်ခဲ့ဖို့ ကောင်းသည်။ အို သူက ကျွန်မကို သိချင်မှသိမှာ။ ကျွန်မကသာ သူရှိ လိမ့်နိုးနိုး အမြဲ မျှော်လင့်ခဲ့ရတာလေ။ အရင် ရှိနေကျ နေရာလေးမှာ သူ့ကို မတွေ့တော့ ကျွန်မ ထိတ်လန့်လို့သွားသည်။ ဘေးဘီဝဲယာ ကြည့်တော့လည်း မိုးစက်မိုးပေါက်တွေသာ မြင်ရသည်။ ကားတံခါး ဆွဲဖွင့်လိုက်သော ကျွန်မ လက်တွေ ထုံကျဉ်အေးစက်လွန်း ခဲ့သည်။

၆။
“သူမရှိတာ တစ်ပတ်ကျော်ပြီ၊ ဟုတ်လား လင်းစက်”

ကျွန်မ အသာအယာ ခေါင်းညိတ်လိုက်တော့ ယုနွယ် မျက်လုံးတွေ ပိုပြူးသွားသည်။
“ဒါဆို သူဘယ်မှာလဲ”

“ငါလည်း အဲဒါ သိချင်တာ ယု၊ ခက်တာက ငါနဲ့ ထိပ်တိုက်တိုးမှာ စိုးတာ”

“အေး၊ တိုးရင်တော့ နင့်အဖေက သူ့ကို နည်းနည်းမှ ညှာမှာ မဟုတ်ဘူး”

ကျွန်မ သက်ပြင်း ခိုးရှိုက်လိုက်ရသည်။ ကျွန်မကြောင့် ထပ်ပြီး ဘယ်သူ့ ကိုမှ အနာတရမဖြစ်စေချင်။ ထိုအနာတရက ကျွန်မကို ပြန်လည်ကူးစက် တတ်သောကြောင့် ဖြစ်၏။
“မှန်တာ ပြောရရင် သူ့လို ပုံစံမျိုး တွေ့ဖူးသလို သူတို့ကြောင့်လည်း ခဏခဏ ဒုက္ခရောက်ရဖူးတယ် ယုရဲ့။ ငါ သူတို့ကို အရမ်းကြောက်တယ်၊ အရမ်းလည်း မုန်းတယ်”
“အေးပါဟယ်”
“ဒါ အစွန်းရောက်မှု ဆိုတာလည်း ငါသိတယ် ယု၊ ခက်တာက ကိုယ် သိပ်ကြောက်နေတဲ့ အရာတွေကို  အမြဲတစေ တွေးနေရလွန်းလို့ သူတို့တွေ ဟာ ငါ့ဦးနှောက်ထဲမှာ ပုံသွင်းပြီးသား အကန့်လို ဖြစ်သွားခဲ့ပြီ”
ယုက ကျွန်မ ပြဿနာကို နားလည်သည့် ငယ်သူငယ်ချင်း ဆိုတော့ ရင်ဖွင့်လို့ ရသည်။ ယု၏ လက်ဖျားတွေပင် ထုံကျဉ် အေးစက်နေသည်။ ကျွန်မ နောက်တစ်ခါ ဆေးရုံ တက်ရမှာကို ယု စိုးရိမ်နေတာပဲ ဖြစ်သည်။

“အေးပါဟယ်၊ တစ်နေ့နေ့တော့ သူ့ကို နင်မေ့သွားမှာပါ”

အနွေးထည် အသာဝတ်လိုက်တော့မှ ချမ်းစိမ့် နေပါလားဟု သိလိုက် ရသည်။ ချမ်းနေသည့်ကြားကပင် အိမ်ကို လွမ်းရသည်။ နိုက်ဂျူတီ၏ အိမ်လွမ်းခန်းတွင် သူ ညပ်ပါသွားကြောင်းကိုတော့ အိပ်မော ကျနေပြီဖြစ်သော ယုအား နှိုး၍ အသိမပေး ဖြစ်တော့ပါ။

၇။
နိုက်ဂျူတီ ကျနေသော အခါ အများနှင့် အတူ အိပ်ရ၍ စာရေး၍ မဖြစ်။ ကျွန်မ စာရေးသည် ဆိုတာ ယုနွယ်ပင် မသိ။  အလုပ် မရှိလျှင် ၀တ္ထုသာ ဖတ်ရတော့သည်။ တစ်ခါတစ်ရံ ၀တ္ထု အရမ်းရေးချင်လျှင်လည်း ဟောက်(စ်) အခန်းထဲ၌ မီးပိတ်၊ မျက်စိမှိတ်ရင်း ဇာတ်ကျောရိုးကို လျှောက်စဉ်းစား နေရသည်။

ထိုည ကျွန်မ နိုက်ဂျူတီ မဟုတ်ပါ။ စိတ်ရှိလက်ရှိ ၀တ္ထုတစ်ပုဒ်နှစ်ပြီး ရေးတော့မည်ကြံကာမှ ထမင်း မစားရသေးတာ သတိရသွားသည်။ အနည်းငယ် အေးစက်နေသော ကြက်ဥမွှေကြော်အား ထမင်းနှင့် ရော၍ စားလိုက်မှ အဆင်ပြေသွားသည်။

“ဟဲ့၊ ခုချိန်မှ ပြန်လာရသလား”

“ယု နွယ်အိမ် သွားနေလို့လေ”

ညီမက ကျွန်မဘေး အသာထိုင်ရင်း နာရီကို စိတ်မရှည်စွာ ငုံ့ကြည့်ပြန် သည်။
“နင် စားလာတယ် ထင်လို့၊ အိမ်မှာ ဟင်းက ဒါပဲကျန်တော့တယ်”
“စားကောင်းပါတယ်ဟဲ့၊ ငါဒီည ၀တ္ထုတစ်ပုဒ် ရေးမလို့”

“အေး ကောင်းတယ်၊ နင် မရေးတာလည်း ကြာပြီဆိုတော့”

“ဒါနဲ့ နင် သူ့ကို တွေ့မိသေးလား”

ညီမ အနည်းငယ် တွေဝေသွားပြီးမှ ပြတ်သားစွာ ခေါင်းခါတော့ ကျွန်မ ၀မ်းနည်းမိသလို အနည်းငယ် စိတ်ချလက်ချ ရှိသွားသည်။ ခဏနေတော့ မဖွင့်တာကြာပြီဖြစ်သည့် ကျွန်မအခန်းတံခါးကို အသာတွန်းကာ ဖွင့်ဝင်လိုက်သည်။ စားပွဲပေါ်က စာကြည့်မီးကို ဖွင့်ပြီး စာအုပ်စင်အောက် ထပ်မှ အေဖိုး စာရွက်များအား ထုတ်ယူလိုက်၏။

ဇာတ်လမ်းအား စဉ်းစားနေရင်းဖြင့်ပင် သူ့အား ယောင်ယမ်း သတိရမိ သွားပြန်သည်။ သူ့အချိုးအစား ပြေပြစ်မှုတွေ၊ အသည်းယားစရာ ကောင်းသည့် သူ့လမ်းလျှောက်ဟန်တွေ။ တံခါးဝ၌ပင် သူ ရှိနေတာ လှမ်းမြင် လိုက်ရသလို အသည်းထဲ အေးခနဲ ဖြစ်သွားသည်။ ဘုရားရေ လင်းရှင်းနေသော မီးရောင် အောက်တွင် သူ တကယ် ရှိနေခဲ့ပြီ။ ကျွန်မ ထင်ထားခဲ့သလို သူ တကယ် ရှိနေခဲ့ပြီ။

“နင် ငါ့အခန်းထဲ ဘယ်လို ရောက်လာသလဲ၊ ထွက်သွား”

သူက ပေကပ်ကပ်နိုင်စွာ ကျွန်မအား စူးစိုက် ကြည့်နေခဲ့သည်။
“နင့်အဖေ အမေ သူ့ဘာသာသူ သေတာ၊ ငါတို့ကြောင့် မဟုတ်ဘူး၊ နင် လက်စား ချေချင်လို့လား၊ ဒါပိုင်နက် ကျူးလွန်မှုနော်”

ဘာစကားမှ မပြောဘဲ၊ တုံဏှိဘာဝေ လုပ်နေသော သူ့ကြောင့် ကျွန်မ အထိတ်တလန့် ဖြစ်သွားသည်။ ထွက်ပြေးဖို့ရာလည်း ၀ရန်တာကနေ ခုန်ချ ဖို့သာ ရှိတော့သည်။
“သွား ၊ နင် ထွက်သွား၊ မသွားရင် ငါအော်လိုက်မှာနော်၊ ငါအော်ရင် ဘာဖြစ် သွားနိုင်မလဲ၊ နင် သိတယ် မဟုတ်လား”။
ရုတ်တရက် သူ ကျွန်မနား တိုးကပ်လာသည်။ အတိုင်းအဆ မရှိ ပေါက်ကွဲသွားသော ရန်ခုန်မှုနှင့် အတူ ကျွန်မ လက်ဖျားခြေဖျားတွေ ထုံကျဉ် အေးစက်သွားသည်။ ရဲတင်းလွန်းစွာ အနားကပ်လာသော သူ့ကြောင့် ကျွန်မမှာ အသက် ရှူဖို့ပင် သတိမရတော့။ မြင်ကွင်း တစ်ခုလုံးေ၀၀ါး သွားချိန်တွင် မတော့ ကျွန်မခေါင်းနှင့် တစ်စုံ တစ်ခု၏ ပြင်းထန်စွာ ရိုက်ခတ်မှု။ ပြာနှမ်းသွားသော ၀န်းကျင်ထဲတွင် နောက်ဆုံး မြင်လိုက်ရသည်က ညိုသော သူ့ကိုဖြစ်သည်။

၈။
ကျွန်မနှင့် မစိမ်းသော ဆေးရုံအနံ့။ နိုက်ဂျူတီ ဆင်းခဲ့တာ ထင်ပြီး ထဟန်ပြင်တော့ ယုနွယ်က အသာ လက်ကာပြသည်။
“နင် ရှော့(ခ်)ရသွားတာ လင်းစက်၊ မနည်းကို Revive လုပ်ရတယ်”

“ငါ”

ကျွန်မ ဘာကိုမှ မမှတ်မိနိုင်သေး။ လက်ဖျံ၌ စိုက်ထားသော Canula ပလတ်စတစ် ဆေးသွင်းပြွန်ကြောင့် ညာဘက်လက် တစ်ခုလုံး နာကျင် နေတာက လွဲပြီး ဘာခံစားချက်မှ ပြန်လည် ဖမ်းဆုပ်၍ မရနိုင်သေး။
“နင်အကြောက်လွန်ပြီး ရှော့(ခ်)ရတာ၊ မနေ့ ည ဆယ့်နှစ်နာရီလောက်က”

ညီမလေးက ၀င်ပြောတော့မှ အခြေအနေကို ခပ်ရေးရေးလေး သဘော ပေါက်မိသွားသည်။
“အဲဒီတုန်းက နင် အရမ်း အော်တာလေ၊ အခန်းထဲမှာ အော်နေတဲ့ နင့်အသံ တစ်ရပ်ကွက် လုံးတောင်ကြားမယ်၊ အဖေက နင့်ကို ကယ်လိုက်တာ”

ကယ်လိုက်တာဟူသော စကားကို သံယောင် ရွတ်ကြည့်ရင်းက တစ်စုံတစ်ခု အတွက် ပူပန်သွားသည်။
“ဘယ်လိုပဲပြောပြော သူ ငါ့ကို ဘာမှ မလုပ်ခဲ့ပါဘူး။ ငါကသာ ကြောက်ပြီး။ သူမသေဘူး မဟုတ်လား”

ညီမမျက်နှာ ပျက်သွားတော့ ယုနွယ်က ကျွန်မလက်အား အသာဆုပ်ကိုင်ရင်း ဖေးမလိုက်သည်။
“သူ မူးပြီး သေသွားတယ် လင်းစက်”
“အာ၊ ငါသတ်တာ မဟုတ်ဘူးနော် ယုနွယ်၊ ငါမသိဘူး၊ ငါနဲ့မဆိုင်ဘူးနော်၊ နင်တို့ သူ့ကို ဘာလို့ ”

“နင့်အသက်က ပိုပြီး အရေးကြီးတယ် မဟုတ်လား လင်းစက်”

လူနာများစွာ၏ အသက်ကို ကယ်ရဦးမည့် ကျွန်မ၏ အသက်က အရေးကြီးသတဲ့လား။ ကျွန်မကြောင့် ဘယ်သူတွေ တိုက်ရိုက် မဟုတ်သော နည်းဖြင့် သေဆုံးခဲ့ကြပြီးပြီလဲ။ လိပ်ပြာ မသန့်တော့သော ကျွန်မ။ မျက်စိအား အတင်း ဇွတ်မှိတ်ပစ်လိုက်တော့ ပူနွေးသော မျက်ရည်တွေ ပါးပြင်ပေါ် တရစပ် ရှပ်ပြေးသွားသည်။

“ငါ မအော်မိရင်  ဘာမှဖြစ်မှာ မဟုတ်ဘူး၊ အဲဒါ ငါ့ကိုညှာလို့ သူ ဒုက္ခ ရောက်သွားတာ”

နောင်တတွေနှင့် ရေရွတ်လိုက်တော့ ကျွန်မ သူ့ကို အလွန်အကျွံ သတိရမိသွားပါသည်။

၉။
သူမရှိတော့တာ ရက်ပေါင်း ကိုးဆယ်ခန့် ရှိပြီ ဆိုသော်လည်း ကျွန်မ၏ ညတွင် သူစိုးမိုးဆဲ ဖြစ်သည်။နီကျင်ကျင် ညမီးရောင်အောက် လှဲအိပ်နေသော  ကျွန်မအတွက် မျက်နှာကြက်မြင်ကွင်းမှာလည်း သူသာလျှင်ဖြစ်သည်။ အိမ်တံခါးဝနား သူကျက်စားခဲ့သည့် နေရာကိုလည်း လွမ်းဆွတ် နှမြောစွာ ပြန်တမ်း တမိရသည်။

ဘယ်သူ့ကိုမှ ကျွန်မ စနက်ကြောင့် ဒုက္ခ မရောက်စေချင်ပါ။ သူ အပါ အ၀င် သူ့အမျိုးကပင် ကျွန်မ ဆေးရုံ တက်ခဲ့ရသည် အထိ နှိပ်စက်နိုင်စွမ်း ကြီးမားခဲ့ဖူးသည်။ နောက်ဆုံးတော့ အသွေးအသား အရိုးထဲထိစိမ့်ဝင် သွားသည်က “အမုန်းစိတ်”ပဲဖြစ်သည်။

စိတ္တဇ ဆန်သော ကျွန်မ၏ စွဲလမ်းမှု အတွက် တစ်စုံတစ်ရာနှင့် ထုချေ  အစား ထိုးပစ်ဖို့ လိုမည်။ စွဲလာပြီ ဖြစ်သော အိပ်ဆေးပြားများကိုပင် သူ မရှိ တော့သည့် အချိန်မှ စ၍ မပျက်မကွက် မှီဝဲခဲ့ရပြီ။ သူ ကျွန်မကို ဘာမှအန္တရာယ် ပေးနိုင်တာ မဟုတ် ဆိုတာလည်း ကျွန်မ သိသည်။

ကျွန်မ၏ ကြောက်စိတ်က ချစ်စိတ်ကို အနိုင်ပိုင်း ပစ်ခဲ့တာ ကျွန်မအမှား ဟုဆိုလျှင်တော့ ဒဏ်ခတ်သည့် အနေဖြင့် သူ့ကို သတိရ နေရဦးမှာ ဖြစ်သည်။
အဖေ့ကို ကျွန်မ အမြဲ မေးဖြစ်ခဲ့သော မေးခွန်းတချို့ရှိသည်။
“ သူ ဘယ်လို သေသွားတာလဲ” ဟူ၍။

“ဆေးများပြီး မူးသွားတာ၊ ဖြစ်ချင်တော့ သူ ရေချိုးခန်းထဲ ရောက်သွားတယ်၊ အဲဒီမှာ ငါ့သမီးက ကြောက်ပြီး ရှော့(ခ)ရနေပြီ၊ အဖေလည်း အဲဒီလောက်တောင် ဖြစ်တဲ့အကောင် ဆိုပြီးတော့”

“သမီးကြောင့် သေတာလား အဖေ”

“မဟုတ်ပါဘူးကွယ်၊ အဖေ့ကြောင့် သူ သေတာပါ”

“ဘယ်လိုပဲပြောပြော၊ သမီး မအော်ရင် သူ မသေဘူး”

အဖေက ကျွန်မ၏ နောင်တရိပ်စွက်သည့် မျက်ဝန်းတွေအား ဗလာနတ်္ထိ အကြည့်ဖြင့် ပြန်ကြည့်သည်။ ကျွန်မကြောင့်ပင် သူ့မိဘတွေ သေဆုံးခဲ့ဖူးသည်။ ကျွန်မ အော်သံကြောင့်ပင်၊ ကျွန်မ လဲကျသွားတာတွေကြောင့်ပင်။ သူတို့ကြောင့်ဖြစ်သည့် ဒဏ်ရာကလည်း နက်ခဲ့သည်လေ။ တစ်ကိုယ်လုံး အင်ပြင်တွေ ထပြီး အသက်ရှူ ကျပ်ခဲ့ဖူးသည့် ကျွန်မအတွက် သူတို့ကို မုန်းတီး ထိတ်လန့်တာ သူများတွေထက်  အစွန်းရောက်လွန်းသည် ဆိုတာ မဆန်းပါ။

သူမရှိသော်လည်း သူ ရှိနေခဲ့ဖူးသည့် နေရာတွေကို နောင်တတွေနှင့် ပြန်ရှာဖွေတိုင်း ရင်နင့်ရမြဲဖြစ်သည်။ တစ်နေ့နေ့မှာတော့ အဖေ လောင်းချ လိုက်သည့် ရေနောက် ဆန့်တငင်ငင်ပါသွားကာ ရေပိုက်ခေါင်းထဲ ပြုတ်ကျ သေဆုံးသွားသည့် သူ့အကြောင်း လိပ်ပြာ မသန့်စွာ ၀တ္ထုတစ်ပုဒ် ရေးဖြစ် လိမ့်မည်။

“သူ ဘယ်သူ့ကြောင့် သေတာလဲ” ဟု အဖေ့အား လိပ်ပြာ မလုံစွာ မေးနေဖြစ်ဦးမည်။ အမှန်တကယ်တော့ “သူ”သည် အနည်းငယ် ညိုမှောင်၍ အချိုးအစား ပြေပြစ်ကျနသော၊ အသည်းယားစရာ လမ်းလျှောက်ခြင်းဖြင့် ကျွန်မ၏ ထိတ်လန့်မှုအား မှားယွင်းစွာမျှားခဲ့သော၊ ဘာအန္တရာယ်မှ မပြုနိုင် သည့်၊ အင်းဆက် အနွယ်ဝင် သာမန် ပင့်ကူလေး တစ်ကောင်သာ ဖြစ်ကြောင်း ကိုတော့ ဘယ်သူ့ကိုမှ မဖွင့်ဟမိဖို့ လိုပါလိမ့်မည်။  သည်တစ်ညကိုတော့ လှပစွာ ညည့်နက်ခွင့် ပေးလိုက်ပါသည်။

လင်းစက်နွယ်

ရာပြည့်စကား

မှတ်မှတ်ရရ ကျွန်မ အလယ်တန်း ကျောင်းသူဘ၀လောက်က teen စထွက် တယ်။ ထိုတုန်းကတော့ ပြောပလောက်အောင် သတိထားမိခြင်း မရှိခဲ့သေး။ teen ကို မေမေ ကိုယ်တိုင် မိတ်ဆက်ပေးလိုက်တော့ ကျွန်မ ကိုးတန်း ကျောင်းသူဘ၀။ teen ထွက်တိုင်း မေမေ ငှားပေးခဲ့ပြီး ကျွန်မအဖို့ လစဉ်ဖတ်ဖြစ် သော စိတ်ဓာတ် ခွန်အားပေး မဂ္ဂဇင်းတစ်ခု အနေဖြင့်ပါ teen ကို ကျွန်မ နှောင်တွယ်မိမှန်း မသိ နှောင်တွယ်မိသွားခဲ့ပြီ။

တဖြည်းဖြည်းနှင့် ကဏ္ဍတွေ ပိုစုံလင်လာ သည်။ ၀တ္ထုတိုတွေကိုတော့ ကျွန်မ အကြိုက်ဆုံးပင်။ ၀တ္ထုတိုတစ်ခုချင်းစီတွင် ပညာပေး ရည်ရွယ်ချက်များ၊ ဆိုလိုရင်း တစ်ခုခုတော့ ပါဝင်တတ်သည်ကို သတိ ထားမိခဲ့သည်။ လူငယ် အချင်းချင်းပေးသည့် Peer Education ပုံစံမျိုးကို နူးညံ့စွာ တွေ့ရှိနိုင်သော တစ်ခုတည်းသော မဂ္ဂဇင်းလည်း ဖြစ်သည်။

teen ကို ပုံမှန် ဖတ်ပြီးမှ ကျွန်မ စာရေးဖြစ် ခဲ့သည် ဆိုလည်း မမှားပါ။ ကျွန်မ၏ ပထမဆုံး အကြိမ် ပုံနှိပ် ဖော်ပြခံရသော စာမူ ခါးတဲ့တမာ မှာလည်း teen မှာသာဖြစ်သည်။ ဆယ်ကျော်သက် ဘ၀စွန်း လာစဉ်တွင်တော့ ကဗျာရှည် ရေးရတာကို ခုံမင်လာသည်။ အမျိုးသမီးကဗျာ ဆရာတွေကို teen မှာ တွေ့ရတတ်သည်။ teen ကဗျာရှည်များက တစ်ပုဒ်ဆို ဆိုသလောက် ပြည့်ဝ နေတတ်သည်။ ကလေးတစ်ယောက်၏ လက်ထဲကို စာဖတ် ၀ါသနာ ပျိုးခင်း တစ်ခု တည်ထောင်ရန် အလို့ငှာ ပထမဆုံး အကြိမ် လက်ကမ်းသင့်သော စာအုပ်ဟု ယူဆမိသည်။ စွဲလမ်းချင်စရာ ကောင်းမည်ဟု မထင်ရပေမယ့် ဖတ်ပြီးလျှင်တော့ လက်က မချချင်တော့အောင် တွယ်ငြိသွားသည်။ ကျွန်မ တတိယ အရွယ် ရောက်သည်ထိ လူငယ် များစွာ၏ လက်ထဲ၌ teen ကို ဆက်လက် မြင်တွေ့ချင်ပါသည်။

မျှော်လင့်ခြင်းများစွာဖြင့်...။
လင်းစက်နွယ်