သည်ကမ္ဘာပေါ်မှာ သည်နေ့သည်ချိန် ကျွန်မ ဘာနဲ့ အသက်ရှူ နေခဲ့သလဲလို့ တစ်စုံ တစ်ယောက်က မေးလာခဲ့ရင် ကျွန်မမှာ ဖြေဖို့ အဖြေ တစ်ခုတည်း ရှိပါတယ်။
ဘာလဲဆိုတော့ ကျွန်မ ကျွန်မ နှာခေါင်းပေါက်နဲ့ အသက်ရှူ နေခဲ့ပြီလေ။ အရင်ကတော့ ကျွန်မရဲ့ နှာခေါင်းဟာ လုံးဝ အသက် မရှိသလို အေးခဲ မာတောင့် နေခဲ့လို့ ယောက်ျား တစ်ယောက်ရဲ့ နှာခေါင်းကို ခေတ္တငှားပြီး အသက် ရှူခဲ့ရဖူးတယ်။ အဲသည်နေ့ အဲသည် အချိန်က စပြီး ကျွန်မဟာ သူများ နှာခေါင်းနဲ့ အသက်ရှူတဲ့ ခပ်ညံ့ညံ့ မိန်းမတစ်ယောက် ဖြစ်သွား ခဲ့ဖူးတယ်။
၂။
ချည်နှောင်ခြင်းကို ကျွန်မ ခံနိုင်ရည် မရှိဘူး။ ဒါပေမဲ့ သမီး ရည်းစားဆိုတဲ့ သမားရိုးကျ ပညတ်ချက်ထဲမှာ ကျွန်မကိုယ် ကျွန်မ နှောင်ကြိုးတွေ အထပ်ထပ် ရစ်ငင်နှောင် ဖွဲ့ပြီးခဲ့ပြီ။ ကိုယ့်အတ္တကို ကိုယ့် ဘာသာ ပေါင်းသင်နေတဲ့ မြေကြီး တစ်ခုလိုပေါ့။ နောက် တစ်ခုက “ကမ္ဘာပေါ်မှာ ငါ အသက် ရှင်နေသရွေ့ ဘယ်သူ့ကိုမှ အရှုံး မပေးဘူး”လို့ အမြဲတစေ ကြုံးဝါးခဲ့တဲ့ ကျွန်မ။ ခုတော့ ခပ်အိုအို ရထားတစ်စင်း ခုတ်မောင်း သွားပုံကိုပဲ အလွတ်မပေး ကြည့်နေခဲ့ ရသလိုပါ။
တကယ်ပါ၊ သက်ဇော် ဆိုတဲ့ ယောက်ျားတစ်ယောက် အတွက် လင်းဘ၀ကို သူ့ဖိနပ် အောက်ချ နင်းခံရဲခဲ့တာ တကယ်ပါ။ ဆယ်ကျော်သက် အမျိုးသမီး တစ်ယောက်ရဲ့ ထွက်သက်ဝင်သက် အားလုံးကို လက်ညှိုး တစ်ချောင်းနဲ့ အမိန့်ပေးတည်း ဖြတ်နိုင်ခဲ့တဲ့လူ။ နောက်ပြီး သာယာနာပျော်ဖွယ် နှုတ်ခမ်း ပါးလေးဆီက ထွက်အံ ပြလာတဲ့ စကားလုံး လှလှလေးတွေနဲ့ လူ။ ဟုတ်တယ်။ ကျွန်မ သက်ဇော်ကို ပထမနှစ် ဆေး တက္ကသိုလ်မှာ စတင် သိရှိခဲ့ရ တယ်။ ပထမနှစ် ပြီးခါနီးမှာ အများလို “ရည်းစား”ဆိုတဲ့ အမိုးတုထဲ ခိုဝင် ခဲ့ကြတယ်။ အဲဒီက စပြီး လင်းရဲ့ဘ၀ဟာလည်း ဟိုးအမှောင် ထုထဲမှာ ယဲ့ယဲ့လေး ကျန်နေတဲ့ ဖယောင်းတိုင် မီးလောက်ပဲ ထွန်းတောက်ခဲ့ရတယ်။
ကျွန်မဟာ ကျွန်မနဲ့ အသွင်မတူ အိမ်သူ မဖြစ်ဆိုတဲ့ အတိုင်း ခံယူချက်ချင်း မတူ၊ မိသားစုထဲ ကြီးပြင်းပုံချင်း မတူ၊ သူ့အကြိုက် ကိုယ့်အကြိုက်ချင်း မတူ၊ ယုတ်ဆွအဆုံး ချည်နှောင်ထားတဲ့ သံယောဇဉ် အမျိုးအစားချင်းတောင် မတူညီတဲ့ ဇော့်ကို ချစ်ခဲ့တယ်။ ဟိုးအဝေးက ကျွန်မ မက်မောတဲ့ နှင်းဆီရုံကြီး တစ်ရုံကို မပိုင်ဆိုင်ချင်ဘဲ သည်အတိုင်းလေး ထိုင်ငေး နေရသလိုမျိုးပေါ့။ ကျွန်မနဲ့ သူနဲ့ကြားမှာ တူတာ တစ်ခုပဲ ရှိတယ်။ အသက်ရှူ တာလေ။ ကျွန်မ သူ့နှာခေါင်းနဲ့ အသက်ရှူ နေခဲ့ရသူပါ။
ကျွန်မရဲ့ ဘ၀ကို အလွန် လှပတဲ့ ပွင့်ချပ်ကားကား၊ ရိုးတံရှည်ရှည်၊ အသွားထက်တဲ့ ဆူးခက်တွေနဲ့ တန်ဖိုးကြီးတဲ့ နှင်းဆီ တစ်ပွင့်လို ထုဆစ်ခဲ့ ပြီးသားပါ။ ဆေးတက္ကသိုလ် တက်ဖို့ စာကိုစာမှန်း သိစ အချိန်ကတည်းက ဆေးထိုး အပ်ကိုင်ဖို့နဲ့ ကလောင်ကိုင်ဖို့ ဆိုပြီး တေးအပ် ပေးဆပ်ခဲ့ ရသူပါ။ ဟိုးငယ်ငယ်ကလေး ဘ၀ကတည်းက ကျွန်မဆီမှာ တခြား လူငယ်များ နည်းတူ အိပ်မက်တွေ ရှိခဲ့တယ်။ ဒါပေမဲ့ ခုထိ အဲဒီ အိပ်မက်တွေဟာ ဆွေးမြည့်သွားတဲ့ ကြိုးတံတား တစ်ခု မဟုတ်လောက်ပါဘူးလို့ မရဲတရဲ ယုံကြည်နေရင်း လျှောက်လှမ်း နေရတုန်း။
ခု ကျွန်မ နောက်ပြန် လှည့်မကြည့်ချင်တော့တဲ့ ဇာတ်လမ်း တစ်ပုဒ်ကို အသည်း မရှိတဲ့ ခပ်မာမာ မိန်း မ တစ်ယောက်ရဲ့ ညည်းသလို ပုံစံမျိုးနဲ့ ပြောပြရမှာ ဖြစ်တယ်။ ကျွန်မက နဂိုက တည်းက အသည်းရှိတဲ့မိန်းမ တစ်ယောက် မဟုတ်ဘူးတဲ့။ ကြားလိုက်သလားလို့။ သိပ် သေချာတာပေါ့။ အနာတမီ ဒိုင်ဆက်ရှင် ဆိုတဲ့ အလောင်း ခွဲစိတ်ခန်းနားက ခပ်အိုအို၊ အပြာရောင် လိမ်းကျံထားတဲ့ နံရံကြီးနားမှာ သူက ကျွန်မကို ပြောခဲ့တာ။
ပထမနှစ် အောက်တို ဘာ ၁၆ ရက်တုန်းက။
“လင်း၊ မင်းအချစ်ဆုံး ယောက်ျား တစ်ယောက်ဟာ ဘယ်သူလဲ”
သူ ကျွန်မကို မျက်လုံး စူးစူးရဲရဲတွေနဲ့ ကြည့်တိုင်း ကျွန်မ မျက်နှာ လွှဲပစ်တယ်။ အဲဒါ ရှက်လို့ မဟုတ်ဘူးလို့ဘဲ ကျွန်မ ညာနေ မိဦးမှာပါ။
“အဖေပေါ့”
“သွား၊ ဒါဆို ကိုယ့် ချစ်သူ မလုပ်နဲ့”
“ဟ- ဘာဆိုင်လို့လဲ၊ ၅၂၈နဲ့ ၁၅၀၀ အဝေးကြီး ဥစ္စာ”
“မရဘူး။ လင်း၊ အဲဒါ မင်း အတ္တကြီးတာ။ မင်း ကမ္ဘာမှာ မင်း အချစ်ဆုံး ယောက်ျားဟာ ကိုယ်ပဲဖြစ် ရမယ်။ မင်း အဲသလို မပြောရင် မင်းကို ကိုယ်ဖြတ်ပစ်မှာ”
အဲသလို အကျပ်ကိုင်ခံ လိုက်ရပြီ ဆိုရင်လည်း လင်းစက်နွယ် ဆိုတဲ့ ခပ်တုံးတုံး မိန်းမ တစ်ယောက်ရဲ့ ခြောက်ကပ်ကပ် နှုတ်ခမ်းတွေက ၀တ္တရား ကျေရုံ မဟုတ်တဲ့ အပြောမျိုးနဲ့ ပြန်နှစ်သိမ့် ပေးခဲ့ပါရဲ့။ အဲသည်အချိန် ကျွန်မ အဖေ့ကို အရမ်း အားနာမိပါရဲ့။
“အေး၊ သည်ကမ္ဘာမှာ ငါ အချစ်ဆုံး ယောက်ျားက နင်ပဲ”
“လိမ္မာသားပဲ လင်း၊ မင်းက ခေါင်းမာမလိုနဲ့၊ တကယ်တမ်းကျတော့ ဖယောင်း ရုပ်ကလေးပါလား”
သူ့စကားကို တစ်စက် ကလေးမှ မငြင်းဘဲ သူ့ညာ ဘက်ပခုံးစွန်းကို မှီလိုက်တယ် ဆိုရင်ဖြင့် ကျွန်မ ရင်ထဲ အမေး တစ်ခုက ဖျတ်ခနဲ ၀င်လာတယ်။
“ဇော်၊ သည်ကမ္ဘာမှာ နင်အချစ်ဆုံး မိန်းမကကော၊ ဟင်”
သူ ဖြေမလားလို့ စောင့်နေခဲ့တဲ့ မိနစ်ပေါင်း သုံးဆယ် အတွင်းမှာ သူ့အသက်ရှူ သံက လွဲလို့ ဘာကိုမှ မကြား ခဲ့ရတဲ့ ကျွန်မ လက်လျှော့ပစ် လိုက်ရတယ်။ အရမ်း မုန်းစရာ ကောင်းတဲ့လူ။
၃။
လူတိုင်းက ကျွန်မက သူ့ကို အရမ်း အနိုင်ကျင့်လို့ သူ့ဘ၀ဟာ လင်းစက်နွယ် လက်ထဲက ရွှံ့စေးလုံးလေး ဘ၀လို့ ပြောကြတယ်။ ဒါပေါ့၊ ရန်ဖြစ်လိုက်တိုင်း ဆဲဆို လိုက်တာ ကျွန်မချည်းပဲကိုး။ ဆဲရင် လူကြားတယ်လေ။ လူမကြားတဲ့ အရပ်ဒေသ တစ်ခုမှာ အဲသည် မိန်းမ တစ်ယောက်ရဲ့ အပေါစားမျက် ရည်ဗုံး ဘယ်နှဗုံး ပေါက်ကွဲ ပြီးပြီလဲလို့ ဘယ်သူတပ်အပ် သိသလဲ။ ဘယ်သူမှ မသိပေမယ့် ရီဗိုက်ဗာ အဖွဲ့ရဲ့ သီချင်းလို “ငါ့ကိုယ်စောင့်နတ်”သိတယ်။ ဒါပေမဲ့ ကိုယ်စောင့်နတ် ဆိုတာ တရားရုံးမှာ အပြန်အလှန် စစ်မေးကြတဲ့ တရားလိုနဲ့ တရားခံပြ ရှေ့နေတွေမှ မဟုတ်ဘဲလေ။
ဒုတိယနှစ် ရောက်တော့ ကျွန်မ ၀ါသနာထုံတဲ့ ဆေးပညာရပ်တွေနဲ့ ထိတွေ့ လိုက်ရတယ်။ အဲသည်မှာ ကျွန်မရဲ့မြားဦးဟာ ခန္ဓာဗေဒ ဂုဏ်ထူး ဖြစ်သွားတယ်။ အဲဒီလို ခက်ခက်ခဲခဲ ဂုဏ်ထူးမှန်း ကြသူတွေထဲ ကျွန်မ ပါသွားတော့ သူက မယုံနိုင်သလို ရယ်တယ်။ ကျွန်မက စာကြမ်းပိုး တစ်ယောက်မှ မဟုတ်ဘဲ။ အဲသလို ရှင့်ရယ် သံတွေကြောင့် လူခြောက်ရာမှာ ဆယ့်ငါးယောက်ပဲ ရွေးခေါ်ခဲ့တဲ့ ကန်းဒီးဒိတ်ထဲ ကျွန်မ ပါသွားခဲ့တယ်။ ကျေးဇူးပဲ ဇော်။
ကျောင်းရဲ့ လှေကားထစ် များစွာထဲက ချောင်အကျဆုံး လှေကားထစ်တွေ ရှိတဲ့ ဆီမှာ ကျွန်မတို့ ထိုင်ဖြစ်ကြတယ်။ ဒါပေမဲ့ “ဆရာများ နားနေခန်း”နဲ့ ကပ်လျက် အကျဆုံး လှေကားထစ် ဖြစ်သွားခဲ့တာကိုက နဂိုကတည်းက ဆွေးနေတဲ့ ကြိုးကို ထောင်းခနဲ၊ တိခနဲ ပြတ်တောက် စေခဲ့သလိုပါပဲ။ အမြဲတမ်း ဆူညံ နေတယ်လို့ ကျွန်မတို့ အတွဲကို အမြင်ကတ် နေတဲ့ အမျိုးသမီး နှစ်ဦးက အဲဒီ အခန်းထဲမှာ ရှိနေခဲ့တယ်။
တစ်နေ့တုန်းဆီက အမျိုးသမီး တစ်ဦးရဲ့ အော်လိုက်သံက ကျွန်မတို့ နှစ်ယောက်လုံး အတူရှိနေလျက်နဲ့ ကျွန်မ တစ်ယောက်ရဲ့ ရင်ဘတ်ဆိုတဲ့ ခွက်ထဲမှာပဲ နေရာကျ သွားခဲ့တယ်။ သူမက အမ်အက်(စ်)အတွက် လုံးပန်း နေရတာဖြစ်လို့ ကျွန်မတို့ ဆူသံတွေက အနှောင့်အယှက် တစ်ခု ဖြစ်သွားလိမ့်မယ်လို့ ကျွန်မ တွေးမိပြီးသား။
ဒါပေမဲ့---
“မင်းတို့ အရမ်းဆူတယ်”
အဲသလို ပြောလိုက်တဲ့ အမျိုးသမီးက “တို့”ဆိုတဲ့ ဗဟုဝုစ်ကိန်းကို သုံးပြသွားပြီး စူးရဲ ခက်ထန်တဲ့ မျက်လုံးတွေ ကိုတော့ ကျွန်မ တစ်ကိုယ်လုံးမှာပဲ ဖြန့်ကြက်ထားခဲ့ တယ်။ ပြီးတော့----
“သက်ဇော်၊ အန်တီ နေကောင်းလား” တဲ့။
“ဟုတ်ကဲ့၊ မေမေ နေကောင်းပါတယ် မမ”တဲ့။
သူတို့ နှစ်ယောက်ရဲ့ အပြန်အလှန် ဖားပွဲကြီးကို ကျွန်မ နားမခံ သာတော့ဘူး။ ကျွန်မ ရင်ဘတ်တွေ ချည့်နဲ့ကုန်တာ ဇော်က ကျွန်မဘက်မှာ လုံးဝ မရှိခဲ့သလိုပါဘဲ။ တံလျှပ်ကို ရေထင်မိခဲ့တဲ့ ကျွန်မက သူတို့ နှစ်ယောက်ရဲ့ စကားသံတွေ ကြားမှာ အရေး မပါတဲ့ နောက်ဖေးသုံး စက္ကူ တစ်စလို ရေဆိုးမြောင်းထဲ မျောပါ သွားခဲ့ပြီးသား။ ပြီးတော့ ကျွန်မနဲ့ ဇော်ရဲ့ဇာတ်လမ်းမှာ အဲဒီအမျိုးသမီးက ဖဲကြိုးဖြတ်ပြီး ချည်ထားသမျှ သံယောဇဉ်ကို ဟိုးကောင်းကင်ထဲ လွှတ်တင် ပစ်လိုက်တာ။
ကျွန်မ မျက်ရည်တွေလည်း မိုးပျံပူဖောင်း တစ်လုံးလို အငွေ့ ပြန်ကုန်တယ်။
၎။
“ဇော်၊ နင့်ကို ချစ်ရတာ ဆုပ်လည်းစူး၊ စားလည်းရူး ရသလိုပဲ”
လို့ ကျွန်မ တစ်နေ့တုန်း ဆီက စိတ်အချဉ် ပေါက်နေတုန်း ပြောလိုက်မိတယ်။ အဲဒီအထိ သူက အဲဒီ စကား ရဲ့အဓိပ္ပာယ်ကိုတောင် သိရှာ ပုံရတာ မဟုတ်ဘူးဆိုတော့ ရာသီဥတု ကြည်လင်နေတုန်း ပါပဲ။
“လင်း၊ မင်း ဒီဘား မကြောက်ဘူးလား”
“နိုး”
“ဘာလို့လဲ”
“ငါက ကလာ့(စ်)၀ါ့ (စ်)တွေ ကောင်းတယ်လေ။ ဘယ်ဘာသာ ကြည့်မလဲ။ တက်(စ်)မှာ ဂုဏ်ထူးနဲ့ အောင်တာတောင် ရှိသေး။ ဒီဘားက ကလာ့(စ်)၀ါ့(စ်)လည်း ကြည့်တာပဲ။ ဘာလဲ၊ နင် စိုးရိမ်လို့ လား”
“မဟုတ်ဘူး လင်း၊ မင်း ဒီဘားထိပြီး တစ်နှစ်နေကျန် ခဲ့ရင် ကိုယ် မင်းရည်းစား မလုပ်တော့ဘူး”
“ဘာလို့တုံး”
“ရှက်လို့”
အင်းလေ။ ဒါလည်း ဖြစ်နိုင်တာပါပဲ။ သူ့မှာ ရှက်ပိုင်ခွင့် ရှိတာပါပဲလို့ ကျွန်မ ဖြေတွေး တွေးနေမိတယ်။ အဲဒီ သိုးမည်းကို ဘာအပြစ်မှ မမြင်ခဲ့လောက်အောင် ဘယ်လို တိမ်အိုတိမ်တိုက်တွေက အမှောင် ဖုံးထားကြပါလိမ့်။
“နင် ကျောင်းတွေ သိပ် မလစ်နဲ့ဦး လင်း၊ နင် ကျောင်းလစ်ရအောင် ဘာကိစ္စတွေ ရှိနေလို့လဲ”
“နင် မရယ်ဘူးလို့ ကတိပေး”
သူက ခေါင်းညိတ်တော့ ကျွန်မက ယုံကြည်စွာပဲ ပြောပြဖြစ်ခဲ့တယ်။ ကျွန်မ က အပြစ်မဲ့တဲ့ သိုးငယ်လေး တစ်ကောင်လေ။
“ငါ တချို့ညတွေမှာ ၀တ္ထုတွေ ရေးနေရတယ်။ အဲဒါ ငါ့ရည်မှန်းချက် အတွက်ပေါ့။ အဲတော့ တော်ရုံနဲ့ မနက်ဆို မထနိုင်တော့ဘူး။ ဒါနဲ့ပဲ ပျက်ကွက်ရက်တွေ များလာရော”
“လင်း၊ မင်း သိပ်လောဘကြီးတယ်။ ကျောင်းစာမှာလည်း ထိပ်ဖြစ်ချင်။ မဆီမဆိုင် ရှုပ်ယှက်ခတ်တဲ့ သည်လောက ထဲကိုလည်း ၀င်ချင်။ နေပါဦး၊ မင်းက ဆရာဝန်လား၊ စာရေး ဆရာမလား”
“ဆရာဝန် စာရေး ဆရာမ လုပ်ချင်တာလေ”
မရယ်ဘူးဟု ကတိက၀တ် ပြုထားခဲ့တဲ့ သူက ခြောက်သွေ့တဲ့ ပတ်ဝန်းကျင် တစ်ခုလုံး အက်ကွဲသွားအောင် ရယ်လိုက်နိုင်တယ်။ မျက်လုံးထဲက အပင်တွေ တစ်ပင်ပြီး တစ်ပင် လဲပြိုလောက်တဲ့ အထိ ရယ်တယ်။ ၀ါးလုံးကွဲ ရယ်ချ လိုက်တာမျိုး မဟုတ်ဘဲ ဟိုး ရင်ခေါင်းတွင်းဆီက အပေါစား ပြက်လုံး တစ်ပုဒ်ကို ကြားလိုက်ရသလိုမျိုး။
အဲသည့် နောက်မှာတော့ ကျွန်မ လေးစားတဲ့ စာရေး ဆရာတွေ အကြောင်း သူ့ကို ပြောပြဖြစ်ခဲ့တယ်။ ကြည်အေးနဲ့ သန်းမြင့်အောင်ကို ယောက်ျားတွေလို့ ထင်ပြီး လင်္ကာရည်ကျော်ကို မိန်းမလို့ ထင်တဲ့ သူ့ရဲ့အူကြောင်ကြောင် အတွေးအခေါ်တွေကိုတောင် ကျွန်မမှာ ရယ်ဖို့ သတိ မရခဲ့။
“လင်း၊ မင်းက ဘယ်လို ၀တ္ထုမျိုးကို ကြိုက်သလဲ”
အဲသည်လို သူက စိတ်လိုလက်ရ မေးလာတိုင်း ကျွန်မ အဖြေက မပြောင်းမလဲ တစ်ခုတည်းပဲရှိတယ်။
“နှလုံးသားနဲ့ ရေးတဲ့ ၀တ္ထုမျိုးကိုပေါ့”
“အရူးမ”
သူ့ကို ကျွန်မ အဲလ်ဘတ်ကမူး၊ နန်စီဟူစတန်၊ ချားလ်စ်ဒစ်ကင်းန်၊ အင်တွန် ချက်ကော့ဗ်၊ ဗော်လ်တဲယားတို့ အကြောင်းပြောရင် သူက ကမ္ဘာကျော် စာရေးဆရာကြီး တွေကို သူ့အိတ်ကပ်ထဲက အကြွေလောက်တောင် တန်ဖိုး မထားတတ်ခဲ့။
“သူတို့တွေက ဒေးဗစ် ကော်လ်ပါဖီးလ်နဲ့ ဘာတော်လဲ”
လို့ မေးလိုက်တဲ့အခါ သူနဲ့ကျွန်မ အခြားနားကြီး ခြားနား နေခဲ့ကြပြီ ဆိုတာ နောက်ကျစွာ သိရှိသွားပြီ။
ချစ်စရာ မကောင်းတဲ့ ယောက်ျားကို ကျွန်မ ဘယ်လောက် ကြောင်သွားပြီး နှလုံးသား ပလ္လင်ထက်မှာ ကိုး ကွယ်ဦးခိုက်ခဲ့လဲမသိ။ သူ့ကို စွန့်လွှတ်ဖို့ ကြံရွယ်တဲ့စိတ် ကူးတွေ အားလုံး ပျက်ပြယ်သွားမြဲလေ။ အဲဒီ စိတ်ကူး တွေကို ကြိုသိပြီးတော့ သူကချည်း အရင်ဦးအောင် စွန့်လွှတ်ခဲ့လေရဲ့။ ဒါတောင် ငါးခါတိတိ ပြတ်စဲခြင်း အမိန့်ထုတ် ခံလိုက်ရတဲ့ မိန်းမ တစ်ယောက်ရဲ့ အရှုံးကို မမြင်တဲ့ လူတွေက သူ့အပေါ် စုတ်တသပ်သပ် သနား နေကြတာတွေ။ ကြည့်စမ်း ။ ဘယ်လောက် ကြီးကျယ်တဲ့ ယောက်ျားမို့ မဏ္ဍပ်တိုင်တက် ပြနေရတာလဲ။
၅။
ကျွန်မက ကျွန်မကိုယ်တိုင် ကျွန်မ ထုဆစ်ထားတဲ့ နှင်းဆီတစ်ပွင့် ဖြစ်ပေမယ့် သူက သူ့မိသားစု ပုံအသွင်းခံ ဓာတုရွှံ့စေး ရုပ်မျှသာ ဖြစ်ခဲ့ တယ်။ နောက်ပြီး ကျွန်မတို့ ကြားမှာ အမျိုးသမီး အများစုက ကန့်လန့်ကန့်လန့် လောက်လန်းတွေလို ၀င်ပါနေတတ် သေးရဲ့။
ပြတ်စဲခြင်းရဲ့ အဓိက တရားခံဟာ သူ့အမေနဲ့ သူ့ အစ်မတွေ ဖြစ်တယ်လို့ ကျွန်မ အတိအလင်း ကြေညာ ရဲပါတယ်။ လှောင်အိမ်ထဲမှာ ပိတ်လှောင် ခံထားရတဲ့ သူ့ဘ၀လို့ ပထမတော့ အသိခေါက်ခက် အ၀င်နက်စွာပဲ ကျွန်မ ယောင်ယမ်းပြီး သနား မိသေးရဲ့။ နောက်တော့ သူဟာ အပိတ် လှောင်ခံ သတ္တ၀ါ မဟုတ်တဲ့ အပြင် တစ်ဦးတည်းသောသား ယောက်ျား အငယ်ဆုံး ဆိုတဲ့ ဂုဏ်ပုဒ် အကျိုးအကြေတွေ ကို သူ့ပတ်ဝန်းကျင်မှာ ကာရံ ထားခဲ့တာ ကျွန်မ နောက်ကျမှ သိသွားခဲ့တယ်။ ဘယ်လောက် တုံးသလဲ။
ကျွန်မရဲ့ နေထိုင်မှုပုံစံ ခွက်ကို သူ့အစ်မရဲ့ စကား လုံးတွေက ခလောက်ဆန်ပြာ ဖြစ်အောင် မွှေနောက် လိုက်လေရဲ့။ ပထမတော့ ကျွန်မကို “ညီမလေး” ဆိုတဲ့ အသုံး အနှုန်းအောက် မိန်းမူးသွားအောင် ချော့ငင်ခဲ့ပြီး သူမတို့ ရဲ့ပုံစံခွက်ထဲမှာ ပုံသွင်းဖို့ ကြိုးစားခဲ့သေးတယ်။ စပျစ်သီးချဉ်တဲ့ အမျိုးမှာ သူတို့ ပါသွားခဲ့ပြီ။ ဖြားယောင်းမှု ပုံစံခွက်ထဲ ယောင်မှားပြီး ခြေကျွံမလိုတောင် လုံးဝ မဖြစ်ခဲ့တဲ့ ကျွန်မ(ခုထိ) လွတ်လပ်ပြီး စိတ်တိုင်းကျတဲ့ နေထိုင်မှုထဲမှာ ရှိနေတုန်းပဲ။ ပြီးတော့ ဂစ်တာလည်း တီးနေတုန်းပဲ။
“ဇော်၊ ငါ့ ဂစ်တာလေး ဆေးပြန် မှုတ်ထားလို့၊ နင့် ဂစ်တာ ခဏငှားနော်”
“ယူပေါ့”
“ပေးလေ”
“အေး၊ ကိုယ် ညနေမင်း အဆောင်ကို လာပို့မယ်၊ ဟုတ်ပြီနော်”
သာယာ နာပျော်ဖွယ် မကောင်းတဲ့ သူ့စကားတွေက ကျွန်မ အတွက်တော့ ၀က်သစ် ချပင်ကြီးဆီက အကောင်းဆုံး ပျားသလက် တစ်ခုလို ချိုနေ ခဲ့တာ အံ့သြစရာ မကောင်း ဘူးလား။ ဂစ်တာက ခရမ်းရောင် နဲ့ အနက်ရောင် ရောစပ်ထားတဲ့ ဟော်လို ဂစ်တာလေး။ ကျွန်မ ဂစ်တာက ကတ်ဖုံး။ သူ့ဂစ်တာက ထင်ရှူးသစ်ကို ထွင်းပြီး လုပ်ထားတော့ ညာ ဘက်လက်ကလေးက လက်ခတ်ပြားလေး ကိုင်ပြီး ခြောက် ကြိုးကနေ ဆွဲချလိုက်တယ် ဆိုရင်ပဲ ကြည်လင်ပြတ်သား နေခဲ့တယ်။
ကိုယ်ပိုင် ကဗျာတွေ၊ ကိုယ်ပိုင် ၀တ္ထုတွေနဲ့ ရီဝေယစ် မူးခဲ့တဲ့ ကျွန်မက ကိုယ်ပိုင် သီချင်းလေးတွေကိုလည်း ရင်ဘတ်နဲ့ ရေးတတ်လာခဲ့ပြီ။ သူ့ကြောင့် ဖြစ်တည်လာတဲ့ ခံစားမှုတွေက အဲသလို သီချင်းတွေကို မွေးဖွား ပေးသလားလို့လည်း အံ့သြမိရတယ်။ ဒါပေမဲ့ ရုပ်လုံး မပေါ်တဲ့ ခံစားချက်တွေက လှပ ခိုင်ခံ့တဲ့ ဇာတ်အိမ်တစ်ခု မတည်ဆောက် နိုင်သေးမီမှာဘဲ ပြိုကွဲခဲ့ရတယ်။ တတိယ နှစ်တုန်းကလေ။ အဲဒီ သီချင်းတွေကို ခုထိ မေ့ဖျောက် ထားတယ်လို့ ကျွန်မ ပြောမိရင် ကျေးဇူးပြုပြီး ဒုတိယ မုသားကို မသိ ကျိုးကျွန် ပြုပေးပါလား။
“မင်း၊ နေပုံထိုင်ပုံက ပေါ့တီး ပေါ့ဆနဲ့၊ ကိုယ့်အစ်မတွေ ပြောသလိုနေပေါ့ကွာ၊ သူတို့က ဗိုင်းကောင်း ကျောက်ဖိတွေ ဆိုတော့ မင်းကိုလည်း သူတို့လို ဖြစ်စေချင်တာ”
“သြော်-အင်း၊ ပေါင်တံ တစ်ခုလုံး ၀င်းခနဲ လက်သွားတာ နွေလယ်ကောင်ကြီးမှာ ငါတော့ဖြင့် မိုးကြိုးပစ်ခါနီး လျှပ်စီးလက်တယ် ထင်လို့”
“ဘယ်သူလဲ”
“နင့်အစ်မတွေပေါ့၊ ငါခု ချိန်ထိ ဖင်ဖုံးရုံ တစ်မည် စကတ်မျိုးကို မ၀တ်ရဲဘူး၊ အဲသလို မ၀တ်ခဲ့လို့ ဗိုင်း ကောင်း ကျောက်ဖိ မဟုတ် ဘူးလို့ နင် ငါ့ကို ဆိုလိုချင်တာလား ဇော်”
အဲဒီမှာ သူ့မျက်နှာတွေက ညိုမည်းအုံ့ဆိုင်း သွားပြီး ခဏကြာတော့ နာဂစ်မုန်တိုင်း တိုက်သွားသလို အနာပေါ် တုတ်ကျသွားတော့ ကျွန်မကို စူးစူးရဲရဲကြည့်တယ်။ (အဲဒီ မျက်လုံးတွေကို ခု ကျွန်မ စာ မေးပွဲ ဖြေခါနီး ညတိုင်း အိပ်မငိုက် ဆေးအဖြစ် အမြဲတစေ ပြန်တမ်းတ ရလေ့ ရှိပါတယ်။) သူ့အစ်မတွေကို ထိခိုက်သွား ပုံရတဲ့ ကျွန်မ စကားက သွေးထွက်အောင် မှန်လွန်း နေလို့လားတော့ မသိဘူး။
အဲဒီညမှာပဲ သူ ကျွန်မ နဲ့ စတုတ္ထအကြိမ် ပြတ်စဲတယ်။ သည်တစ်ခါတော့ ကျွန်မ မငိုတတ်တော့ဘူး။
၆။
ကျွန်မ ငိုရလွန်းလို့ မျက်ရည် မရှိတော့ဘူး။ ကျွန်မ မငိုတတ်တော့ဘူး။ ဒါပေမဲ့ စတုတ္ထ အကြိမ် ပြတ်စဲခြင်းအတွက် တချို့တွေက ကျွန်မ အသည်းကွဲ သွားပြီလို့ ထင်တယ်။ အမှန်တော့ ခဏခဏ ကွဲလွန်းလို့ ချုပ်ရိုးပြုတ်ထွက်သွားပြီး ပြန်အက်ကွဲ သွားခဲ့တာပါ။
အဲသည် သတင်းဟာ သူ့မာတာနဲ့ မွေးသဖခင်ဆီ ဆိုက်မြိုက်စွာ ရောက်ရှိပြီးတဲ့ သကာလ လင်းစက်နွယ် ဆိုတဲ့ မိန်းမဟာ သူ့သားနဲ့ လုံးဝ မအပ်စပ်ဘူး။ မထိုက်တန်ဘူးလို့ လှေနံဓားထစ် ဆုံး ဖြတ်ခဲ့ကြတယ်။ လူတစ်ယောက်နဲ့ တစ်ယောက် ဆက် ဆံရေးမှာ ထိုက်တန်တယ်၊ မထိုက်တန်ဘူး ဆိုတာကို ဘယ်လို ချိန်ခွင်တွေနဲ့ စက်ပြီး တိုင်းတာကြသလဲ။ အပေါ စားယေဘုယျ ဆန်တဲ့ ဆုံး ဖြတ်ချက်တွေနဲ့လား။ လူသားတိုင်းရဲ့ သခင်လို့ အမည်ရတဲ့ ငွေနဲ့လား။ ဘာနဲ့လဲ မသိ။ သေချာတာကတော့ ကျွန်မက ကစ်(စ်)မီကွစ်(ခ်) ပန်းတစ်ပွင့် ဖြစ်ရင်တောင် ၀မ်းကိုက်ရောဂါ ပျောက်ကင်း စေနိုင်တယ် ဆိုတဲ့ တိုင်းရင်းသား ရာဇ၀င်တစ်ခုကို သူတို့ ဘက်က ထုချေဖို့ ဆုံးဖြတ် ထားပြီးသား။
သမိုင်းဆိုတာ မေ့ပစ်လို့ ရတယ်။ ဖျောက်ဖျက်လို့တော့ မရဘူး။ အဲဒါ သူတို့ တစ်မိသားစုလုံးလုံး မသိခဲ့ကြဘူး။ သိပ်မကြာမီမှာ သူကျွန်မကို ပြန်ဆက်ခဲ့တယ်။ ဆေးတက္ကသိုလ် မြေမှာ နားလည်မှု၊ ရင်းနှီးမှုတွေနဲ့ ကျွန်မ အဲသည် ယောက်ျားကို ချစ်ခဲ့တာ ထုံးစံအတိုင်း“ငါ့ကိုယ်စောင့်နတ်” သာသိတယ်။ ဒါပေမဲ့ နောက်နှစ်ပတ်ရဲ့ ဆေးဝါးဗေဒ စာမေးပွဲ တစ်ခုဟာ သူနဲ့ ကျွန်မကို ကိုက်ဖြတ်ပစ်မယ့် ခပ်ထက်ထက် သွားစွယ် တစ်ချောင်းဆိုတာ နောက်ကျပြီးမှ သိရှိခဲ့တယ်။
ဆေးဝါးဗေဒ ဖြေဖို့ အချိန်တွေ ကျွန်မမှာ အလုံလောက် မရှိဘူး။ နောက်တစ် နေ့ နေ့လယ်တစ်နာရီ ဖြေမယ့် စာမေးပွဲတစ်ခု အတွက် ပြင်ဆင်နေတဲ့ ကျွန်မစိတ်တွေ လေးလံ သွားခဲ့တယ်။ ကျွန်မ ဆီမှာ ပရော်ဘလစ် စာရွက်တွေ မစုံဘူး။ အဲဒီတော့ အကူအညီ လိုတိုင်း ကျွန်မ ဘယ်တော့မှ သတိမရ ဖြစ်တဲ့ သူ့ဆီ ကိုမှ ဦးနှောက် စုတ်ချာချာက သတိ ရသွားခဲ့ပြီး လက်စုတ်တွေက ဖုန်းနံပါတ် တစ်ခုဆီ အပြေးအလွှား နှိပ်ပြ နေခဲ့တယ်။
လေးဆယ့် နှစ်ခါမြောက် ကြိုးစားပြီး ဆက်နေ တဲ့ ကျွန်မရဲ့လက်ချောင်းလေး တွေ၊ နောက်ပြီး မျှော်လင့်ချက် တိုက်အိမ်လေးတွေဟာ သုံးစက္ကန့် ကြာရုံမျှ သုံးသွားတဲ့ နောက်ထပ် အတ္တကြီးတဲ့ ယောက်ျားတစ်ယောက်ရဲ့ စကားသံ တစ်ခုအောက်မှာ တင်ပဲ အစအနတောင် ရှာမရ အောင် ပျောက်ကွယ်... ပြီးတော့ အငွေ့ပြန်သွားကြ လေရဲ့။
လတ်စသတ်တော့ သူက သူ့အဖေရဲ့နှာခေါင်းနဲ့ အသက်ရှူနေခဲ့တာကိုး။
“ငါ့သား အိမ်မှာ မရှိဘူးကွဲ့၊ ရှိရင်လည်း ခေါ်မပေးနိုင်ဘူး၊ ငါ့သားက ဂလေ ရိုက်နေတဲ့ အစားထဲက မဟုတ်ဘူး”
“ခွပ်” ခနဲ ဖုန်းခွက်ချ လိုက်သံအောက်မှာ တီတီတီ တီ ဆိုတဲ့ အသံကိုကြားလို့ ဖုန်းချပစ်ရတော့မယ့် အသိတောင် ၀င်မလာနိုင်တော့ဘဲ ကျွန်မ တုန်လှုပ်သွားတယ်။ ဟော- ခန္ဓာရဲ့ တုန်လှုပ်မှုက ကြမ်းပြင်ပေါ်၊ ကြမ်းပြင်ကနေ အ၀တ်စ ပါးပါးလေးတွေပေါ် လှိုင်းတစ်ခုလို ဆက်ကာဆက်ကာ ပျံ့သွားလိုက် တာ။ တော်ရုံနဲ့ ဖုန်းမချနိုင်ဘဲ ကြောင်စီစီ ရှိနေတုန်း။
ခဏနေတော့ တစ်ခုခု ရဲ့ စူးစူးဝါးဝါး အော်သံ။ ဟုတ်တယ်။ တစ်နေရာဆီမှာ လူတစ်ယောက်ရဲ့ အာခေါင်ခြစ် အော်သံတွေ ရှိတယ်။ မနက်ဖြန်စာမေးပွဲဆိုတဲ့ ကိုယ် လွတ်ရုန်း အတ္တဟိတကို ဆရာဝန်စိတ်က အနိုင်ယူသွားတယ် ထင်တာပဲ။ အဲဒီ ညက လူတစ်ယောက်ရဲ့ အသက်တစ်ချောင်းကို ကယ်လိုက်တဲ့ ကျွန်မ ပီတိတွေ ရေမျောကမ်းတင် ဖြစ်ကုန်တယ်။ အဆောင်ကို ပြန်ရောက်တော့ ည နှစ်နာရီခွဲ။
ကျွန်မ တစ်ယောက်တည်း မျက်နှာကြက် အဖြူ အပေါ်က ပန်ကာလေကြောင့် လွင့်ခနဲ လွင့်ခနဲ ဖွာဖွာသွားတဲ့ ပင့်ကူမျှင်စတွေကို ငေးစိုက်ကြည့်နေရင်း မိုးလင်း သွားခဲ့တယ်။ ကျွန်မ စာကျက်လို့ မရ တော့ဘူး။ တစ်ရေးမှ မရသေးပေမယ့် ရီဖလက်(စ်)အီ ဆိုဖေဂျိုက်တစ်(စ်)၊ အစာရေ မျိုပြွန်ရောင်ခြင်းလို့ ရောဂါ အမည်ရတဲ့ ကောင်မလေး တစ်ယောက်ကို ညတွင်းချင်း ဆေးရုံပို့ပေးခဲ့၊ ညတွင်းချင်း ကုသမှု ပေးစေခဲ့။ အဲ- သည် ပီတိက ကျွန်မ နှလုံးသားကို ရှင်သန်စေတုန်း။
“ကလင် ကလင်”
“ဟဲလို”
“အေး- မင်း ဘယ်လို လုပ်လိုက်တာလဲ လင်း၊ မင်းမနေ့က ငါ့ကို ခဏခဏ ဆက်တယ်ဆို”
“ဟုတ်တယ်၊ ငါနုတ် (စ်)တွေ မစုံလို့၊ နင် ဟိုနေ့က ကူးပေးမယ် ပြောပြီး ကတိ ဖျက်တယ်။ ငါနင့်ကို လေး ဆယ့်နှစ်ခါ တိတိ ဆက်တာ အလကား မဟုတ်ဘူး။ နင့် ကတိကို ပေါ်လွင်စေဖို့”
တစ်ဖက်က ခပ်အက်အက် ရယ်မောလိုက်သံ ကြောင့် ကျွန်မနဲ့ဇော် ကမ္ဘာရဲ့ မြောက်ဝင်ရိုးစွန်းနဲ့ တောင်ဝင်ရိုးစွန်း နှစ်ခုလို လုံးဝခြားနား သွားခဲ့ပြီ ဆိုတာ နှမြော တသမှု မရှိဘဲ သိလိုက်ရတယ်။ ဝေးပေ့စေ။ လွင့်ပေ့စေ။ သွားစမ်း၊ ထွက်သွားစမ်း။
“အေး၊ ငါ တကယ်တော့ အိမ်မှာ ရှိနေခဲ့တယ်။ နင့်ကို သောက်မြင်ကတ်လို့ကို ဖုန်းမကိုင်တာ။
“နင်မှ မဟုတ်ဘူး၊ စာမေး ပွဲတွင်းမှာ ဘယ်သူ့ ဖုန်းကိုမှ ငါ သောက်ရေး မလုပ်ဘူး”
“စာတွေ အရမ်းကျက် နေရတယ်ပေါ့၊ သြော်- ဂုဏ် ထူးများ မှန်းလားပဲ”
သူက အနာပေါ် တုတ်ကျသွားလို့ ရှူးရှူးရှဲရှဲ ဖြစ် သွားတယ်လေ။ သူနဲ့ဂုဏ်ထူးက အဝေးကြီး။ ဂုဏ်ထူး က ဖရဲသီးဆို သူက ဘဲဥ တစ်လုံး။ အဲသလို လူစားမျိုးက သိပ်နာကျင်ပြတတ် သေးရဲ့။ အသည်းလေးက နုထွတ်လိုက်တာကွယ်။ ကျွန်မ အသည်းက ခဏခဏ ကွဲလွန်းလို့ ဖိုက်ဘရိုးစစ်နဲ့ တောင် ကျက်ကုန်ပြီ။ အသည်းက ခြောက်ကို ခြောက်နေပြီ။
“မင်း ငါ့အဖေကို ဘာတွေ ပြောလိုက်သေးလဲ”
“အဟက်..ဇော် ရှိပါ သလားရှင်လို့ ခြောက်လုံးလောက်ပဲ ပြောလိုက်တာပါ။ အဲဒါ ရှင့်အဖေ အတွက်တော့ ခြောက်လုံးပြူး သေနတ်ထဲက ကျည်ဆန်ထိသလို ဖြစ် သွားမလားတော့ မပြောတတ်ဘူး”
“ကောင်းပြီ လင်း၊ မင်း ဒီနေ့ကစပြီး ငါရဲ့တရားဝင် ရည်းစား မဟုတ်တော့ဘူး။ အဲဒါ မင်းအသည်းထဲ သံမှိုလို ရိုက်ထားလိုက်...."
...
လင်းစက်နွယ်
(ရွှေအမြုတေ မဂ္ဂဇင်း၊ဇွန်လ ၂၀၁၁)
(ပယ်(မ်)ဘရောင်းနှင့် ဝေါလ် တာဟေဂန်တို့၏ စာစုအား မြင့်စိုးလှိုင် မြန်မာပြန်သည့် ပညာစကားလက်ဆောင် စာအုပ်မှ ကောက်နုတ် ထားပါသည်။)
No comments:
Post a Comment